SöySəl Evi--- خانه شعر تركي

بختيار وهابزاده كيمدئ؟

چهارشنبه 24 خرداد 1391
+0 به یه ن

بختيار محمود اوغلو وهابزاده 1925-جي ايلده شكي شهرينده آنادان اولموشدو. 1934-جو ايلده عايله سي ايله برابر باكيا كؤچن شاعر 1942-جي ايلده اورتا مكتبي بيتيريب، باكي دؤلت اونيوِرسيته سي نين فيلولوگيا فاكولته سينه داخل اولموش، 1947-جي ايلده همين فاكولته ني بيتيريب، 1951-ده فيلولوژي علم لر دوكتورو عالمليك درجه سيني آلميشدير.

بختيار بديعي ياراديجيليغا ايكينجي دونيا موحاربه سي ايل لرينده باشلاميش، 1945-جي ايلده يازيچي لار اتفّاقي نين عوءضولوگونه قبول اولونموشدور. بديعي ياراديجيليقلا ياناشي، 1940-جي ايلدن 1990-جي ايله قدر اونيورسيته ده درس دئميشدير. 1980-جي ايلده آذربايجان علم لر آكادمياسي نين موخبر عوءضوو سئچيلميشدير.

وهابزاده 70-دن آرتيق شعر كتابي، 2 مونوقرافيا، 11 علمي پوبليسيست كتاب و يوءزلرله مقاله نين مؤلّفي دير.

باكي آكادميك دؤلت درام تئاتري نين صحنه سينده اونون «وجدان»، «ايكينجي سس»، «ياغيشدان سونرا»، «اؤزوموزو كسن قيلينج»، «جزاسيز گوناه» و «دار آغاجي» پيئس لري تاماشايا قويولموشدور. او، تاريخي و موعاصير مؤضوعدا 20-دن آرتيق ايري حجملي پوئمانين مؤلّفي دير.

1974-جو ايلده «امكدار اينجه صنعت» خادمي، 1985-جي ايلده ايسه اونا «خالق شاعري» آدي وئريلميشدير. بختيارين بوءتون اثرلرينده دونيايا فلسفي باخيش اساس يئر توتور. آذربايجان ادبيّاتي نين، بوءتؤولوكده آذربايجان ادبي فيكري نين گؤركملي تمثيلچي سي اولان خالق شاعري بختيار وهابزاده نين آدي تكجه آذربايجان جمهوريّتينده دئييل، اونون حدودلاريندان چوخ-چوخ اوزاق لاردا تانينير و اثرلري بير چوخ ديل لره ترجومه اولموشدور.

بختيار وهابزاده 2009-جو ايلين فِورال آيي نين 13-ده 84 ياشيندا دونياسيني دگيشدي و فخري خيابانيندا دفن اولوندو.

 

بو متن آلتداكي قايناقدان سئچيلميشدير:

بختيار وهابزاده، آخي دونيا فيرلانير، حاضيرلايان: سعيد موغانلي، 1388، كرج، پينار يايين ائوي

 

بختيار وهابزاده نين شعرلريني چوخداندير كي وبلاگدا تقديم ائتمك ايستيرم. ايندي بو ايشي گؤرمك ايستيرم.

 

كتابين موشخصاتي:

كتابين آدي: گولوستان پوئماسي و نئچه سئچيلميش شعر

شاعر: بختيار وهابزاده

تايپ: ي. ف.

فورمت: PDF

صفحه لر تعدادي: ۷۶

سايز: ۱ مگابايت

 

بوندان قاباقجا بو شاعردن آنا ديلي آديندا بير شعر وبلاگدا يازميشام. بو شعري ده بو بؤيوك شاعردن اوخويون:

 

سنين ديليندن

 

ايل لرله بير عشقين جؤرونو چكديك
آيريلساق، گوءن سؤنر، ايل قينار بيزي
ائنيش- يوخوشونو بير اؤتدوگوموز
يول لارا نه دئيَك، يول قينار بيزي

سن دئدين، باشلانان قورتارسين گرك
من دئديم، دويمايير آرزودان اوءرك
بيرگه اكديگيميز گوءلو درمه سك
تيكان لار ال چالار، گوءل قينار بيزي

بس دئييل بو الم، بو كدر منه
ائله دين دونياني سن هدر منه
گؤزل سؤزلر دئدين نه قدر منه
گل ايندي دانلاما، ديل قينار بيزي

چوخ چكه بيلمه ديك نازيني عشقين
قيش گليب، ياشاديق يازيني عشقين
يامانجا سينديرديق سازيني عشقين
بيلمه ديك، آخيردا تئل قينار بيزي

دئدين كي، عشقيمله بختيارام من
دئدين كي، دؤنمرم قلبين سسيندن
اينديسه چكينيب ائل طعنه سيندن
دئييرسن، عاييبدير، ائل قينار بيزي


----- كتابي يوكلمك اوءچون تيكله يين -----  * يئني لينك*

قايناخ: دده قورقود كيتاب خاناسي




بؤلوم : بختيار وهابزاده AZ-TR
یازار : ائشيلداق


بلاگا گؤره



    شعر توركي- خانه شعر توركي-شاعران و اديبان تورك-بيوگرافي شاعران تورك-زندگي نامه شاعران تورك-سويسل-
    شعر تركي-خانه شعر تركي-شاعران و اديبان ترك-بيوگرافي شاعران ترك-زندگي نامه شاعران ترك-

بؤلوم لر

سون یازیلار

باغلانتی لار

یولداش لار

آرشیو

ایمکان لار

سایغاج