اورهان پاموك ايله دانيشيق
+0 به یه ن
اورهان پاموك ايله دانيشيق (۱۳۸۲ ايلينده ياپيليب) - عليرضا جوانبخت قولونجو
۱۳۸۲ -جي ايلين باهاريندا توركييهلي يازار و دونيا شؤهرتلي رومانچي “اورهان پاموك”- ون اولوسلار آراسي كيتاب سرگيسي اثناسيندا تئهرانا گلهجهييني اؤيرهنديك. پاموك ايله اولان يازيشمالاريميز ائلهجه ده اونون اثرلريني فارسجايا چئويرن “ارسلان فصيحي” ايله دانيشيقلاريميزدا تورك مودئرن ادبياتي حاقيندا تئهراندا و پاموك-ون حضورو ايله بير سئمينار كئچيرمهيه قرار وئرسك ده تئهران بيليميوردو مسئوللاريندان بيزه اؤنجهدن سؤز وئرديكلرينه رغماً يارديم آلا بيلمهديييميزه گؤره بونو باشارماديق.
بيز پاموك ايله يالنيز قيسسا بير دانيشيق آپارا بيلديك. بعضي علتلره گؤره بو دانيشيغي ايندييه قدهر هئچ بير نشريهيه وئرمهميشديم.
سون زامانلاردا پاموك ائرمني-تورك مسألهسي حاقدا دانيشيركن، ائرمنيستان دؤولتيني دستكلهمهسي هاميميزي تعجوبلنديردي. اورهان پاموك ائرمنيستانين قاراباغ توركلرينه ائتديكلري جنايتلري اؤرت- باس ائتمك اوچون اونلارين امكداشي اولموشدور دئمك ايستهمهسك ده اونون آوروپا بيرلييينده شؤهرتي و كيتابلارينين تيراژي چوخالسين، دئيه توركلرين ضيدينه بير دانيشيق آپارماسيني اينانماغا مجبور قاليريق. دئمك پاموك ادبيات دونياسيندا داها يئني موفقيتلري الده ائتمك اوچون سياسي اويونلارا گيرمكدن بئله چكينمهميشدير. آنجاق پاموك بيزيمله دانيشيغيندا سياستدن اوزاق اولدوغونو دئمك ايستهيير!!
ظنيمجه ۲ ايل كئچسه ده اورهان پاموك ايله بو قيسا دانيشيق يارپاق اوخوجولارينا ايلگينج اولاجاقدير.
(حيدرشادي ايله برابر پاموك-و گؤرمهيه گئتديك، اونو آذربايجانلي يازار”عمران صلاحي” و “رضا سيد حسيني” ايله دانيشيركن تاپديق. دانيشيغيميزين بير چوخ بؤلومو سياسي قونولارا چكيلدي، اونلاري حذف ائتمهيه مجبور اولدوم.)
سورو: اورهان بهي! بورادا گونئي آذربايجانلي لارين اؤزلرينه دؤنوشو و اؤز كيمليكلرينه ساري گئتمهلري بير ادبيات اورتايا چيخارميشدير. سيزجه بئله بير اويانيش و بئله بير حركت دونيا چاپيندا بير ادبيات يارادا بيلرمي؟
پاموك: ايلكده من فيكريمي سؤيلهييم؛ بوتون ميليتچي اويانيشلار، حركتلر اؤنجه ادبياتلا باشلار، سونرا قزئتهسي اولور، درگيسي اولور. سونرا بو ادبياتلا قالماز، سياسي اولور. آما بونون گئنلليكله آماجي دونيا چاپيندا ادبيات اولماز، سونوندا سياسي بير شئي اولور.
آما ادبياتچي اولما ايچ گودوسو(غريزهسي) يوكسك اولانلار او اؤلكهدهكي رسمي ديلده يازيرلار، “آيتماتوو”(چنگيز آيتماتوو) روسجا يازير. بيلمم آنلادا بيليرم يا يوخ، آيتماتوو تورك اولماغين آلتيني جيزماق ايستهمهيير، ادبياتچي اولماغين آلتيني جيزماق ايستهيير، روسجا يازير.
آما بو دئدييينيز شئي ايسه او ميلّي ازيلميش ديلي قوللانماق ايسه بلكي بؤيوك يازاري اورتايا چيخارا بيلمهيه آما او اولوسون بؤيوك يازاري اولور. او اؤز ميلّتينين، او اؤفكهلي و اَزيك حيصّهنين، گونئي آذربايجانليلارين قهرماني اولور.
سورو: سيز بونلاري يعني ميليتچيليك اساسيندا بير ادبيات اورتايا چيخانلاري تاماماً ايچ گودولريني ادبياتدان باشقا بيليرسينيز؟ يوخسا…
پاموك: بو ايكيسي اؤرتوشه بيلر. ايكيسي عيني يئرده بولوشا بيلر ده. هم ادبي ايچ گودوسو يوكسك هم ده كنارا آتيلمش كندي ديلينه ده ساريلماق ايستهيير. بوتون ميلت- دؤولتلرده بئله قورولدو. “دانته” ايتاليانجا يازدي، او زامان هر كس لاتينجه قونوشوردو. او ان بؤيوك ايتاليانجانين ايلك بؤيوك كيتابيني يازدي.
سورو: اورهان بهي! چنگيز آيتماتوو-دان بويوردونوز، من قبول ائديرم او روسجا يازير آنجاق من اونون كيتابلاريني اوخودوغوم قدهر دوشوندويوم بودور كي آيتماتوو بير ميليتچيدير… (بونو دوستوموز غفور امامي زاده سؤيلهدي)
پاموك: بلكي بوتون تورك دونياسيني چوخ گؤزل يازير، چوخ گؤزل، او بؤيوك بير يازاردير. من بونو چوخ سؤيلهديم.
سورو: بير ده كي اورهان بهي! بيز بونو فبول ائديريك بورادا بير آزينليق ديلده يازساق ادبياتيميز دونيادا ائله تانينماز. آما بيز باخاندا چنگيز روسجا يازير، بيز فارسجا يازساق، فارس ادبياتي دونيادا هئچ تانينماميش…
پاموك: (اوجا سسله گولهرك) ناسيل اولسا فرق ائتمز دئييرسينيز…
سورو: بيز توركجه يازساق داها اؤنملي اولور سانيرام…
پاموك: آنلاييرام، اوَت حاقليسينيز. بير ده بير شئي وار يعني، سيزين، دونيادا بئله آزينليق ديللره، آزينليقدا قالميش ديللرده كنديني سسلنديرن يازارلارا قارشي چوخ بؤيوك بير ايلگي وار. بئله كندينيزي دويورا بيلرسينيز آوروپادا، آمئريكادا كي؛ ايراندا آزينليق توركجه يازير، بو ايلگينج، بونا بير ايلگي وار يعني.
سورو: بيزيم ديليميز آنادولو توركجهسي كيمي اوغوز توركجهلريندندير. من بئله دوشونورم كي توركييهده اولان باشاريلاردان، توركييهده اولان ادبياتدان و اورادا گليشن ديلدن بيز ده قوللانا بيلريك البت…
پاموك: طبيعي. چوخ دا اوزاق دئييل ديللر يعني.
سورو: اورهان بهي! باخيشينيزي “اورتاق توركجه”يه گؤره سؤيلرميسينيز؟
پاموك: اونون اولماسيني ايسترديم، ائله بير شئي گئرچكلشسين ايسترديم كي بير كيتاب چيخسين بوتون ايراندان، نه بيليم دوغو توركوستانا قدهر هر كس عيني حرفلرله اوخويا بيلسين ايسترديم. بونون ساغلانماسيني ايسترديم، ائله بير قزئته چيخسين.
سورو: ايللر اؤنجه بونو “اسماعيل قاسپيرالي” ايستهميشدير، سيزجه اون ايللر كئچندن سونرا اونون دئدييينه اساساً بير باشاريلار وارمي؟
پاموك: بيلمهييرم، چوخ دا تعقيب ائدهنمهييرم. اليفبالار داغيلميش، هر كس كندي اؤلكهسيندهكي، كيمي كيريل اليفباسيندان قوللانير، كيمي لاتين، كيمي عرب، كيمي اويغور. بير ده كولتورلر ده بير آزجيق دؤولتلرينه باغلي اولاراق ائتگيلنميش، توركجه بير سيرا يئرلرده رسمي ديل دئييل، ائله خيرپالانميش. ايدهآللارا اوناي وئرمك اوچون بونلار سياسي گوجلرله، ايرادهلرله اولور. اورالاردا يوكسك استراتژيك مركزي بير سياسي تورك گوجو نه يازيق كي يوخدور. بونو ايستهمك باشقا، بونون اولا بيلمهسي باشقا.
بؤلوم : اورهان پاموك AN-TR
یازار : ائشيلداق
